بحب الفرص في العلاقات و بحب ندي فرصة و بحب نتأكد و ندي زمن
لكن حقيقي في وحدة بتكون عارفة نفسها إنها عملت كتير عشان تكون الإنسانة الحالياً دي و إتخطت كتير عشان تكون بالمستوى الفكري و الروحي و المادي الوصلت ليه..
لو في شخص (رجل في حياتك) خايف منك ممكن تطمني وسط الكلام لكن مهما حصل:
ما تقصقصي من نفسك عشان تقنعي شخص بيك
ما توافقي بالعمرك ما وافقتي بيه عشان شخص يوافق بيك
ما تمشي و تمشي عشان المركب تمشي و عشان بديتي من فترة
ما تصدقي إلا الصوت الجواك بتعرفي كويس لو خوف و لا مُنبه
ما تختاري راجل مُحطم و تصلحي فيه عشان يرضى بيك
ما تتزوجي عشان بديتي إجرائات الزواج
ما تدعي إنك عادية و إنتِ عارفة إنك مميزة
ما تمثلي و تظهري مميزاتك عشان عيوبك بتترفض
و ما تختاري راجل بس عشان بمشي ليك عصبيتك
و لو عاوزة حنان أملي نفسك حنان أول و إلا إمتحاناتك كلها حتكون رجال ظاهرهم حنية و باطنهم الكثير من العاهات
و لو راجل خايف منك أمشي منه عشان الموضوع دا ما بنتهي مهما حاولتي تظهري إنك طيبة و حنونة في حاجة فيك و عندك مُخيفة بالنسبة ليه ما لم يمتلكها و تكون في عالمه هتفضلي مُخيفة عنده..
ما تحاولي تدي شخص كل مفاتيحك و إنهزماتك و لحظات ضعفك عشان توري عندك جانب ضعيف..
فعلياً لو راجل قال ليك انتِ بتستاهلي الأحسن مني سواء بي كلامه أو أفعاله فا هو دا الحقيقي ما تستني كتير و تحاولي تثبتي عكس كدا عشان السنوات حتمشي و إنت بتكذبي على نفسك و كنت فاكرة حتقدري تعيشي أصغر من كدا و أقل لكن ما حتقدري..
الحياة الما مقاسك و اللي بتحاولي تخليها حلوة و مقاسك و توقفي نفسك من إنه مقاسك يزيد لأنه في الاساس هي ما قدرك كانت مصيرها تضايقك و تخنقك ما تستني ..
أكبري و حققي و أنجزي و يمكن هو يغير خياره لكن ما ممكن تكوني مولودة عظيمة و مختلفة و بتحاولي تكوني عادية دي تمثيلية كفيلة توجعك من جوة كل يوم..
ما حتقدري تخبي أحلامك الكبيرة مهما حاولتي
إسمحي لنفسك تكوني حقيقتك
#رانيه_عمران